德甲班霸拜仁慕尼黑再度失分，周六(17日)德甲作客0比1输畀奥格斯堡，21年来首次喺德甲连续4场不胜，而且佢哋连续87场联赛有入波纪录亦告断缆，沙迪奥文尼嘅入球荒令球迷担心。

拜仁喺欧联连赢国际米兰同巴塞隆拿，但喺联赛就频频失分，对上3轮联赛全部打和，今仗更加0比1输畀奥格斯堡。向来以火力强大见称嘅拜仁，对上一次喺德甲「食白果」已经系2020年2月，今场前连续87场联赛都入到波。

拜仁王牌前锋沙迪奥文尼已经连续5场冇波入，前德国国脚夏文直指呢位塞内加尔前锋未能融入拜仁体系。拜仁教练拿高斯文赛後表示：「我唔认为球员心态有问题，问题出喺射门技术上，面对一个上晒身嘅门将，我哋要用唔同方式嘅攻门，今场我哋本来应该入3球。」