阿仙奴周日(18日)英超作客3比0大胜宾福特，喺国际赛休战前重夺榜首位置，呢场波嘅焦点落喺补时阶段上阵嘅华尼利身上，呢位只得15岁181日大嘅「细路」入替一刻，成为英超史上最年轻上阵球员，酋长球场喺2006年开幕嗰阵，华尼利直头仲未出世！

司职进攻中场嘅华尼利今个月先升上阿仙奴U21，今场竟然有机会喺英超落场，领队阿迪达赛後表示：「派佢上阵纯粹系我嘅直觉，当我第一次见到佢，我就有呢个感觉，教练团对佢有好高评价，佢跟一队练咗几课，我非常锺意我见到嘅嘢。」

虽然华尼利落场後掂波机会唔多，但已经创造英超历史，之前哈维艾利洛为富咸首战英超系16岁30日，华尼利就系第1个上阵嘅15岁球员，赛後加比尔马天尼利仲拖住佢走向客队球迷区，向球迷介绍呢位天才小将。