将於周五(23日)凌晨上演嘅欧国联波兰主场对荷兰，双方2位巴塞前锋罗拔利度夫斯基、迪比大斗射术，固然引人关注，其实仲有1位射手值得留意，就系荷兰「新云佬」加普。

呢位23岁前锋今夏几乎加盟曼联，虽然最终未能成事，但由於红魔鬼仍然想签前锋，下次转会市场重开，加普仲有机会成「魔」。

现年23岁嘅加普身高1米87，技术非常全面，可以胜任中锋及翼锋，佢上季为燕豪芬上阵47场，射入21球及15次助攻，引起曼联、阿仙奴注意，但呢两支英超劲旅因为分别签入安东尼马菲奥斯、加比尔捷西斯，结果「舍弃」加普。

不过，加普以行动证明实力，今季荷甲上阵7场入8球，计埋盃赛，更加系上阵13场入10球，换言之开季冇几耐，佢入波数字已等於上季一半，非常高效率。

因此，再次引起曼联兴趣，一旦C朗明年1月走人，红魔鬼就会出手收购加普，据悉燕豪芬将佢标价为5,000万欧元，并唔算贵。

值提一提，曼联2001年收购当时燕豪芬神锋云尼斯达莱，佢成为红魔鬼殿堂级射手，曼联自然想历史重演。

咁啱燕豪芬现时由「云佬」执教，如果曼联想签加普，相信佢应该会「帮一帮」红魔鬼。