今个冬季转会窗预期会特别热闹，因为有多位顶级球星到咗合约最後一年，可以同新球会签预备合约，甚至直接倾转会，转会费亦比预期低，有传媒列出5大潜在转会巨星，个个份量十足，如果有球队全部买晒，可以立即组成一支巨型班。

几位大牌球星当中，C朗系最有机会离开曼联嘅一位，佢今夏已经积极争取转会，但唔成功，消息指佢经理人佐治文迪斯近期又再做工作寻找新买家，现时潜在买家有两间，一系拜仁，一系车路士。

巴塞隆拿今夏有意出售前锋迪比，可惜搵唔到买家，嚟紧佢同球会合约剩番半年，冬窗期间巴塞将再度努力帮佢物色下家，令球会进减轻薪酬支出，目标球会系祖云达斯。

马高阿辛斯奥已拒绝同皇马续约，合约到期就会自由身离队，皇马为免人财两失，今个冬窗系买走佢嘅最後机会，之前有传过利物浦想签佢，再激啲嘅传闻系佢打算过档巴塞，如果系真就有戏睇咯。

史坚尼亚系国米防线重心，但佢合约亦都到期，如果续约唔成就焗卖，由於佢身价同人工甚高，国米好大机会将佢出售，目标球会系巴黎圣日耳门，因为只有PSG先有咁多钱买佢。

马体会钢门奥比历合约快将到期，暂时冇续约消息，极可能离队，马体会好可能喺1月将佢卖走，潜在接收球会系曼联，因为红魔鬼打算弃用迪基亚，佢哋一路想签奥比历，依家终於有机会。