曼联今个夏天重金签入中坚利辛度马天尼斯，身高只有1米75嘅佢一度受到质疑，但佢就用表现证明自己中坚实力，估唔到荷兰领队尹戈尔仲夸张，打算将另一曼联新兵杜维尔马拉西亚，由左闸改造成中坚，呢位小将身高只得1米69，真系难以想像。

荷兰上场欧国联对比利时，杜维尔马拉西亚後备入替尼敦阿基，出任左中坚位置表现唔错，尹戈尔赛後承认打算将佢改造成左中坚：「马田斯恩迪受伤肯定赶唔切踢世盃，我需要另一个人出任左中坚位置，我想睇杜维尔马拉西亚喺呢个位置嘅表现。」

尹戈尔表示，杜维尔马拉西亚属於「烂打型」球员，而戴利白兰特就系「战术型」，对比利时一仗就系靠杜维尔马拉西亚嘅速度制衡奇云迪布尼，尹戈尔表示：「佢嘅防守做得唔错，不过喺运球组织上仲有进步空间。」如果尹戈尔改造成功，曼联嘅调动能力亦会得益。