皇家马德里前锋宾施马上季大爆发，协助球队拎到西甲同欧联冠军，周四(29日)凌晨喺《马卡报》嘅西甲颁奖礼，亦顺利连擸3个大奖，呢位法国前锋更宣布已经伤愈，将会喺今周联赛强势复出。

宾施马喺颁奖礼入面，先後获得西甲金靴奖、年度最佳球员奖(球迷投票)以及迪史堤芬奴奖(记者投票西甲最佳球员)，呢位34岁老将表示：「我为自己嘅努力而骄傲，但系我想得到更多、做得更好，今季目标系赢西甲、入好多好多波、最重要系享受足球。」

宾施马因为大腿受伤已缺阵差唔多1个月，不过佢喺颁奖礼入面表示已经完全康复：「我已经同球队一齐操练，感觉非常之好，好期待周日晚场比赛，我已经准备就绪。」皇马将会喺今个星期联赛主场对奥沙辛拿。