白礼顿可以话系今季英超最令人惊喜球队，开锣首战就作客击败曼联，其後主帅朴达被车路士挖角抢走，估唔到请来名不经传嘅迪萨比接手领军，仍然可以保持强势，几乎赢到利物浦。

白礼顿翼锋李安度杜沙特表现最抢镜，今仗射入3球，成为史上第3位喺英超作客晏菲路球场上演帽子戏法嘅球员，呢位比利时国脚一战成名，被捧为「新夏萨特」。

比利时近十几年盛产大批高质素球员，由以前夏萨特、费兰尼、高柏尼，到现时曼城助攻王奇云迪布尼，都系独当一面嘅猛将。

现年27岁嘅李安度杜沙特事业际遇唔及几位前辈，佢出身於比甲球队亨克，期间曾多次被外借，2019年正式转投白礼顿，表现愈来愈好，上季英超上阵34场入8球，今季更加大爆发，踢7场英超已有5球进帐，包括今场射入利物浦3球，成为继尼路维、艾沙维之後，第3位喺英超作客晏菲路球场「戴帽」嘅球员。

身高仅1米71嘅李安度杜沙特个人突破能力强，无论身形同踢法都似夏萨特，佢之前21次为比利时上阵入5球。经此一役之後，杜沙特人气急升，有助佢争夺比利时国家队席位，出战今届世界盃。