周日(3日)英超「曼市打吡」，曼联作客耻辱性3比6不敌曼城，虽然领队坦哈格用尽5个换人名额，但葡萄牙巨星C朗拿度就惨被无视，黑面坐足全场。坦哈格赛後更发表离奇解释，竟然话唔换C朗入场系「唔想佢经历呢场羞辱」，呢番言论即引起多位名宿、名人热议，怒插坦哈格嘅解释先系对C朗最大羞辱。

C朗今季失去正选，不过之前每仗都有份落场，今仗曼联半场已输紧4球，换边後安东尼马菲奥斯破蛋後，坦哈格决定更换箭头，但佢选择安东尼马迪尔入替拉舒福特，当时镜头即刻影住黑晒面嘅C朗，负责评述嘅加利尼维利都话：「佢个表情已经话系知佢谂紧乜。」曼联喺70分钟用埋最後换人名额喺费特身上，C朗重投曼联後首次坐足90分钟冷板。

赛後坦哈格被问到点解弃用C朗，佢嘅解释竟然系唔想C朗经历呢场惨败嘅羞辱：「出於对C朗嘅尊敬、对佢伟大嘅职业生涯，我系唔会换佢入场，其实我唔想公开讲出嚟......另一个好处系我可以畀需要上阵时间嘅安东尼马迪尔落场。」

坦哈格呢番解释引起争议，同C朗友好嘅英国名嘴皮尔斯摩根喺社交网发炮：「喺曼联全季最重要嘅比赛将C朗放喺後备，被对手摧毁後再用晒5个换人名额，最後话系出於尊重C朗？坦哈格系个自大嘅骗子，C朗喺曼联遭受嘅对待先系耻辱。」

曼联名宿坚尼亦表示：「我觉得曼联唔尊重C朗，佢哋应该系转会窗完结前畀佢走，我知道事实系有球会提出收购，但坦哈格留低佢又摆佢喺後备唔用，成件事只会愈嚟愈肉酸，我认为曼联对C朗系好唔尊重。」至於加利尼维利就较温和：「我明白坦哈格，0比4同1比6嗰阵换C朗系个耻辱，不过佢唔应该讲出嚟，但我锺意佢咁老实。」