西维尔今季成绩惨淡，踢咗7场西甲仅有1胜2和4负，加上2场欧联都入唔到波，西班牙传媒指教练卢比迪古好大机会短期内被炒，会方已经接触阿根廷名帅森柏奥利接手领军。

曾经执教西班牙国家队及皇马嘅卢比迪古，3年前开始担任西维尔教练，并协助球队夺得2020年欧霸盃冠军，上季西甲获得第4位。

不过，好景不常，西维尔今季表现走晒样，踢7场联赛只系赢过爱斯宾奴，搞到现时排尾四，随时有降班危机。

西维尔喺欧联表现一样一无是处，包括主场以0比4输畀曼城，作客打和哥本哈根0比0，如果周四(6日)凌晨欧联主场赢唔到多蒙特，相信卢比迪古会立即执包袱，盛传英超狼队已经打算搵佢过档。

至於西维尔亦接触森柏奥利接手领军，呢位光头主帅曾经执教智利、阿根廷国家队，同埋2016/17年球季教过西维尔，非常熟悉呢支西甲球队，应该可以迅速上手。