车路士将於周四(6日)凌晨欧联主场对AC米兰，亦系射手奥巴美扬倒戈母会之战，呢位33岁加蓬国脚出身於A米青年军，当时有幸经常同2007/08年球季效力呢支意甲劲旅嘅朗拿度见面，奥巴美扬表示，「大哨」对佢影响非常深远，教晓佢点样成为1位出色射手。

奥巴美扬同AC米兰有深厚渊源，三兄弟都曾经喺A米青年军受训，结果得「细佬」奥巴美扬打出名堂，佢话当年最幸运系遇上朗拿度：「老实讲，当时朗拿度有啲肥，但仍然系最佳前锋，我冇谂过取代佢嘅位置，只系想睇住佢操练同比赛，从中学习，努力提升自己，朗拿度好有个性，有坚强精神，前锋就需要呢种特质，佢喺我成长过程中有好大影响力。」

不过，奥巴美扬效力A米3年日子都系被外借，最後转投圣伊天，佢曾於2017年「国际冠军盃」为多蒙特上阵对AC米兰，并射入2球，协助球队赢3比1，今仗再次倒戈，相信都系冇面畀，要全力争取入球。