夏天以7,000万镑高价加盟车路士嘅韦斯利科芬拿，转会後表现一直受到质疑，呢位法国中坚周四(6日)凌晨欧联终於做英雄，喺对AC米兰一仗门前混战中先开纪录，拎到喺车路士第1个入球，但系佢上半场尾段喊住伤出，赛後更要揸拐枚行路，情况令人担心。

上半场尾段，科芬拿同拉菲尔利亚奥争波期间拗伤，最初睇落冇乜大问题，但佢之後愈行愈痛，被换走嗰阵更神情哀伤兼落泪，完场後更被影到要拎住2枝拐枚行路。车路士领队朴达赛後表示：「科芬拿受伤系全晚唯一负面消息，我唔想胡乱猜测，要等进一步检查结果，希望佢冇大碍。」

21岁嘅科芬拿系黑仔王，上季季初佢因为断脚，休息咗超过7个月时间，如果今次再受重伤，唔单止冇机会出战年底世界盃决赛周，对车路士亦系重大打击。