曼联近年缺乏1位可靠射手担起锋线，加上C朗今季严重走下坡，令问题更突显，但其实红魔鬼最需要嘅人，已经喺阵中，就系安东尼马迪尔。

呢位法国国脚今季仅上阵104分钟，已射入3球及1次助攻，换言之平均35分钟入1球，效率极之惊人，只要佢冇伤冇病，绝对系曼联嘅破门利器。

安东尼马迪尔效力曼联7年，大部份时间表现低迷，上季更有半季时间被外借去西维尔，球迷已经对佢不抱任何希望。

不过呢位26岁前锋今夏归队後，表现脱胎换骨，喺季前热身赛频频入波，当时领队坦哈格已经话会重用马迪尔，点知佢开季前夕受伤，令人以为呢位「新亨利」又故态复萌，坦哈格当时一番言论成为笑柄。

其实坦哈格并冇睇错人，安东尼马迪尔伤愈後，表现愈来愈好，近2场上阵射入3球，如果话对曼城一役梅开二度系因为对手领先太多放松，缺乏说服力，咁上仗欧霸盃，马迪尔後备上阵2分钟就入波，证明佢的确已重拾9号仔射手信心同触觉，曼联今季复兴之路，马迪尔将担任重要角色。