周六(15日)凌晨英超，宾福特主场以2比0击败白礼顿，前锋艾云东尼包办2个入球，呢位26岁英格兰国脚今季英超已经有8球进帐，同热刺神锋哈利卡尼睇齐，表现锐不可当，英国传媒认为佢将会成为英格兰争夺今届世界盃冠军嘅「秘密武器」。

白礼顿24岁中场美维朴日前被诊断出患有遗传性心脏病，无奈被逼挂靴，今场开波之前，白礼顿球员都着上特别设计嘅T恤，支持美维朴克服病魔。

不过开波之後，白礼顿并未能取得优势，上半场27分钟就失守，宾福特前锋艾云东尼以一下潇洒後脚射门入波。

换边之後，宾福特获得12码，艾云东尼主射入网，佢今季英超已经入8球，同哈利卡尼并列射手榜第2位，仅次於入15球嘅艾宁夏兰特，所以英国传媒认为英格兰主帅修夫基应该徵召艾云东尼出战下月举行嘅世界盃决赛周，提升捧盃机会。

艾云东尼原本可以代表牙买加国家队，但佢3次拒绝徵召，一心要为英格兰效力，今年9月终於首次入选「三狮兵团」出战欧国联对意大利及德国，但佢2场都冇份上阵，令人怀疑能否入选出战世界盃大军名单，但艾云东尼近期愈战愈勇，大大提升踢世界盃嘅机会。