曼联周日(16日)英超主场同纽卡素闷和0比0，亦系自费格逊喺2013年退休後，「红魔鬼」第31场英超0比0赛事，系英超球队同期内最多球队。今场正选上阵嘅C朗拿度，下半场本来有个「机警」入波，但最争议性被判诈胡，C朗更喺投诉期间食埋黄牌，认真惨情。

下半场纽卡素後场获得罚球，法比安舒哈用脚轻力将个波「碌」畀门将尼克普比处理，点知C朗突然加速抢走个波送入空门，佢认为法比安舒哈踢波嗰刻已等同开波，可惜球证朴臣唔同意呢个谂法而判诈胡，C朗更因投诉过激食黄牌。

同样情况喺英超亦曾经出现，2010年利物浦对新特兰一仗，费兰度托利斯就抢走对手「碌」畀门将嘅波，再交畀古积特射入，佢哋同样认为「碌波」系等同「开波」，而当年球证系判入球有效。

曼联领队坦哈格赛後嬲爆表示：「我冇嘢讲，全世界都睇到，我同球证分享咗我嘅睇法，全世界都见到发生咩事。」纽卡素领队艾迪侯域就力撑球证：「我都睇到，成件事好清晰，法比安舒哈唔系开波，佢只系碌个波畀尼克普比。当时C朗阻住尼克普比开波，佢喺度等紧球证吹鸡，如果咁都判入真系难以接受。」