利物浦前锋迪亚高祖达上仗英超对曼城，受伤退下火线，经过详细检查之後，领队高普亲口证实呢位25岁葡萄牙国脚伤势严重，将缺席香港时间11月21日凌晨展开嘅世界盃决赛周。葡萄牙锋力受削之下，必然影响争标本钱，意味C朗想一尝世界盃冠军滋味，加冕为「完美球王」，造成重大打击。

迪亚高祖达上仗踢到补时，突然按住右脚表情痛苦，需要用担架抬出场，当时已经知道情况不妙。主帅高普於当地时间周二(18日)公布呢位爱将伤势：「祖达嘅小腿肌肉伤势严重，踢唔到今届世界盃，虽然佢唔需要做手术，但仍然会缺阵一段长时间，我唔敢讲实际要抖几耐，睇怕应该系数个月，对於佢、利物浦、葡萄牙都系坏消息，祖达系一位非常坚强嘅人，佢情绪冇受影响。」

迪亚高祖达喺社交网表达感受：「晏菲路最美好嘅夜晚，我以最差方式结束了，我嘅梦想喺最後一刻破灭了。」祖达上仗踢正选，表现非常积极，协助利物浦以1比0击败曼城，取得今季最重要胜利，但自己却遭受重创，可以话系由天堂跌落地狱。

迪亚高祖达曾经为葡萄牙上阵29次，射入10球，包括今届世界盃外围赛有4球进帐，代表作一定系作客塞尔维亚，个人梅开二度。

祖达被视为C朗喺国家队最佳拍档，如今佢无缘世界盃，C朗冇咗1位好帮手，又要喺锋线独力支撑大局，问题系呢位老将已经37岁，状态大不如前，葡萄牙争标前景悲观。葡萄牙属於世界盃H组，同组对手有乌拉圭、加纳、南韩。