5年前以1亿欧元转会费由多蒙特加盟巴塞隆拿嘅奥士文尼迪比利，曾经被嘲讽为「世纪水货」，呢位25岁法国国脚2022年大踢身价波，今年喺西甲已经贡献16次助攻，欧洲5大联赛仅次於美斯，成为巴塞进攻发动机。

奥士文尼迪比利效力巴塞以来，有唔少时间养伤，亦试过违反纪律，操练迟到，曾经多次传出会被卖走。不过，踏入2022年後，迪比利表现大爆发，结果令巴塞改变主意，今夏同呢位翼锋续约。

奥士文尼迪比利今季愈战愈勇，喺西甲射入3球及5次助攻，同皇马当红翼锋云尼斯奥斯祖利亚一样创造8个联赛入球。

由2022年1月计起，奥士文尼迪比利今年喺西甲已有16次助攻，欧洲5大联赛之中，仅比「一哥」巴黎圣日耳门球王美斯少3次，同奇云迪布尼并列第2位，可见迪比利创造力已达世界顶级。

罗拔利云度夫斯基可以不断为巴塞入波，都要多得奥士文尼迪比利提供源源不绝嘅机会，巴塞想喺周四(27日)凌晨欧联生死战击败拜仁慕尼黑，奥士文尼迪比利将担当关键角色。