周二(25日)凌晨英超赛事，韦斯咸主场2比0击败般尼茅夫後，由赛前第17位，连跳7级升上第10位，不过今次佢哋2个入波都有争议，赛後般尼茅夫主帅加利奥尼尔提出阴谋论，指VAR判决系针对小球会。

主场出击嘅韦斯咸形势占优，制造唔少埋门镜头，踢到上半场补时阶段，葛特苏马喺门前混战中顶入，但佢入波前队友泰路基拿疑似手球，经VAR检查後判入球有效，韦斯咸领先1比0返更衣室。下半场般尼茅夫力图反扑，但去到92分钟，客队守将施梅拉底线封波被省中手，球证经VAR检视後判12码，宾华马操刀射入，助韦斯咸赢2比0。

出任般尼茅夫看守领队唔够2个月嘅加利奥尼尔，赛後批评VAR判决系针对小球会：「自从我上任之後，经历过10次要VAR审视嘅严重事件，冇一次结果系对般尼茅夫有利。」加利奥尼尔今仗亦因投诉球证执法，被罚咗1张黄牌。