英超球会阿士东维拉怒炒谢拉特4日後，闪电请到新帅上任，球会周二(25日)宣布西班牙名帅艾美利执教，呢位前巴黎圣日耳门、阿仙奴教头系「盃赛专家」，维拉今次系支付520万镑违约金，将佢由维拉利尔买断，由於申请工作证需时，预计艾美利会喺下月初主场对曼联一仗首度领军。

现年50岁嘅艾美利同维拉签约3年，11月1日正式上任，喺申请工作证期间，周六(29日)作客纽卡素嘅英超赛事会由看守领队丹斯继续带队，艾美利会喺11月6日对曼联首次领军。呢位西班牙教头喺2018至2019年曾执教阿仙奴，对英超并唔陌生。

艾美利系有名嘅盃赛专家，曾带领西维尔连赢3届欧霸盃冠军(2014、2015、2016)，之後教巴黎圣日耳门亦赢过2次法足盃同2次法联盃，喺阿仙奴亦曾杀入欧霸盃决赛，虽然饮恨而回，但2021年再次带领维拉利尔赢欧霸盃，再次省靓「盃赛专家」呢个金漆招牌。