欧霸盃A组赛事，阿仙奴主场1比0小胜FC苏黎世，成功保住榜首资格直接跻身16强，不过「兵工厂」今场亦有坏消息，日前获日本选入世界盃大军名单嘅富安健洋，比赛尾段疑似拉伤大腿，可唔可以出战世界盃成为一大疑问。

阿仙奴今场要赢波先可以确保首名出线，半力出击之下仍占上风，17分钟由基兰泰亚尼轰入世界波开纪录，不过领先後表现滑落，尾段更加被FC苏黎世反客为主，後备入替嘅富安健洋只系踢咗15分钟，就因为拉伤大腿而退下火线，佢离场嗰阵表情沮丧，似乎知道伤势唔轻，阿仙奴最终守住1比0胜果，以2分力压燕豪芬首名晋级。

阿仙奴领队阿迪达赛後表示：「富安健洋觉得肌肉有啲唔妥，伤势系点暂时唔知，但我哋唔想冒险而将佢换走，未来48小时会再做检查。」23岁嘅富安健洋系日本国家队後防主力，普通嘅大腿拉伤一般都要休息2至3个星期，出战世界盃就要同时间竞赛。