祖云达斯虽然最後一轮欧联分组赛主场1比2不敌巴黎圣日耳门，但仍凭较佳得失球，力压同分嘅海法马卡比，取得第3位，可以转战欧霸盃。

呢支意甲球队今仗最大收获系养伤10个月嘅「星二代」费达历高基艾沙终於复出，对球队争取今季余下赛事提升成绩，大有帮助。

费达历高基艾沙系意大利夺得上年欧国盃冠军嘅功臣，但今年1月10日对罗马，左膝韧带严重受伤，意大利缺少呢位25岁翼锋之下，搞到喺世界盃外围赛附加赛出局。

基艾沙年初做完手术之後，原本预计抖7个月，但最终用咗10个月先至康复，再次披甲上阵。佢喺今场74分钟後备入替，虽然表现时间唔多，但总算可以重新开始。

祖云达斯今季成绩大倒退，基艾沙复出之後，可望提升球队攻力，争取下半季大反弹。