欧联分组赛周四(3日)凌晨煞科！16强最後两个席位落喺AC米兰同RB莱比锡手上，E组AC米兰主场4比0大胜萨尔斯堡，相隔9年再度杀入欧联淘汰赛、F组嘅RB莱比锡作客亦4比0数萨克达出线。欧联16强当中，英超、德甲各占4队，雄霸半壁江山，而16强抽签会喺下周一(7日)晚举行。

AC米兰今场对萨尔斯堡只要打和就出线，不过佢哋并唔锡力，基奥特14分钟接应角球轻松顶入後，46分钟而头槌助攻拉迪高历顶入2比0，57分钟基奥特再下一城，呢位法国老将补时阶段再助攻祖利亚美斯亚斯埋斋，个人贡献2入球2助攻，带领AC米兰大胜4比0出线。

AC米兰赢波後以E组次名出线，佢哋对上一次杀入欧联16强，已经要数到13/14球季，教练皮奥利赛後表示：「16强抽签无论对边队，都肯定充满挑战，不过我哋亦都系意甲冠军，喺欧联行得愈远愈好！」16强除AC米兰外，仲有国际米兰同拿玻里两支意甲球队。

F组嘅出线席位就由德甲嘅RB莱比锡拎到，意味5支参赛嘅德甲球队，有4队成功跻身16强，同英超一样成为16强最大客户，而英超4队入面有3队更加系以小组首名身份晋级。至於西甲就最令人失望，4队参赛球队只有皇家马德里晋级。

欧联16强名单

首名：拿玻里(意甲)、波图(葡超)、拜仁慕尼黑(德甲)、热刺(英超)、车路士(英超)、皇家马德里(西甲)、曼城(英超)、宾菲加(葡超)

次名：利物浦(英超)、布鲁日(比甲)、国际米兰(意甲)、法兰克福(德甲)、AC米兰(意甲)、RB莱比锡(德甲)、多蒙特(德甲)、巴黎圣日耳门(法甲)