巴塞隆拿中坚碧基周五(4日)凌晨喺社交网宣布，今个星期西甲主场对艾美利亚，将会系佢最後一次喺鲁营球场亮相，预计呢位35岁老将会喺下周作客奥沙辛拿後，正式结束18年嘅职业球员生涯。

碧基喺毫无先兆之下，周五突然喺社交网发布影片，宣布呢个震撼决定，碧基表示：「过去几个星期、几个月，大家都喺度谈论碧基，我一直都冇出声，但依家我要讲我自己嘅事。同大家一样，我一直系巴塞隆拿粉丝，我喺一个足球家庭成长，梦想唔单止系做职业足球员，而系要做巴塞隆拿球员。最近我成日谂起细个嘅事，如果有人话我知所有梦想都可以达成，我嘅梦想会系效力巴塞隆拿、赢晒所有冠军、赢埋欧国盃同世界盃、可以同世界最好球员合作、成为巴塞隆拿嘅队长......足球、球迷带畀我所有嘢。我嘅童年梦想已经实现，我想话畀大家知，我依家决定结束呢次旅程。」碧基最後表示：「我一直都话，巴塞隆拿系我最後一间球会，今个星期会系我最後一次喺鲁营球场比赛，之後我会继续变成球迷，继续支持巴塞隆拿。」

着名记者Fabrizio Romano透露，碧基同巴塞隆拿合约原本明年6月到期，依家会提早喺下星期解约。巴塞隆拿周日(6日)凌晨主场对艾美利亚，下周三(9日)凌晨作客奥沙辛拿，系西甲喺世界盃前最後一轮联赛，预计亦会系碧基足球生涯最後一战。