周日(6日)凌晨英超，曼城主场惊涛骇浪下以2比1击败富咸，力压阿仙奴重登榜首。「蓝月亮」今场赢得辛苦，佢哋大部份时间踢少1个下，又系靠伤愈复出嘅艾宁夏兰特做救星，喺补时5分钟射入12码绝杀赢波，连领队哥迪奥拿都High到向住镜头疯狂庆祝。

艾宁夏兰特因伤缺阵2场後，今仗复出先任後备，曼城17分钟就由祖利安艾华利斯突破越位抽入领先，以为顺风顺水之孖，祖奥简斯路喺26分钟禁区内撞跌哈利威尔逊，输12码兼食红牌，富咸由安达斯彭利拿操刀追平。踢少个嘅曼城之後继续攻，踢到补时阶段奇云迪布尼博到12码，後备上阵嘅艾宁夏兰特射入，带领曼城险胜2比1完场。

艾宁夏兰特入波後，哥迪奥拿High到疯狂庆祝，甚至向住镜头做出超兴奋嘅振臂动作，古怪画面赛後被网民疯传，哥迪奥拿表示：「10个打11个情况下，我哋好有耐性，史东斯、贝拿度施华、洛迪、所有人都踢得好出色，我喺曼城教咗7年，仍然都系好激动，我为呢班球员感到光荣。」

复出即刻奉献绝杀嘅艾宁夏兰特，成为英超史上第1个喺头12场联赛入18球球员，更加特别嘅系，佢爸爸夏兰特球员时代喺英超踢10年(诺定咸森林、列斯联、曼城)，总入球数字亦系18球，囝囝只系用3个月时间就追平老窦10年纪录。