英格兰日前公布嘅世盃大军名单，较为意外嘅名字系纽卡素前锋哥林威尔逊，呢位30岁老将过去只曾为英格兰踢过1场正选，对上一次上阵更系3年前，领队修夫基表示拣佢全因为「状态好」，而哥林威尔逊就成功兑现5年前对自己嘅承诺。

哥林威尔逊击败艾云东尼、谭美阿巴谦入选，修夫基解释：「哥林威尔逊状态非常好，而且佢喺国家队有多少少经验，我哋对佢亦都较熟悉。」哥林威尔逊今季喺英超踢10场入6球，系纽卡素排联赛第3嘅重要原因，佢两名队友尼克普比同捷比亚，同样入选英格兰大军。

哥林威尔逊入选後表示：「2017年，我喺卡塔尔为膝部韧带伤势进行康复治疗，当时我连英格兰国家队都未入过，离开卡塔尔前我同自己讲，我会喺2022年返嚟踢世界盃。只要努力同决心，任何事情都有机会达成！」