南韩球星孙兴民喺月初欧联对马赛一役受伤，导致眼眶骨折，但仍然入选国家队踢今届世界盃，呢位30岁前锋近日戴住面罩参加操练，造型似电影《青蜂侠》角色，非常型仔，预料有望上阵首场世界盃分组赛对乌拉圭。

孙兴民表示戴住面罩操练感觉良好：「现时只需要继续监测伤势情况，睇下康复进度，正如之前所讲，我会尽一切努力，唔会令任何人失望，希望同队友们一齐度过一个难忘嘅世界盃。」

身为南韩队长嘅孙兴民为国家队上阵104场，射入35球，呢支亚洲劲旅能否出线16强，就要睇「孙仔」表现。南韩属於世界盃H组，将於11月24日首仗对乌拉圭，之後会斗加纳、葡萄牙。