荷兰主帅尹戈尔今次徵召4位「00後」小将参加世界盃，最受注目必一定年仅19岁嘅沙维西蒙斯，呢位拥有苏里南血统嘅进攻中场细细个已被誉为难得一见嘅天才级球员，佢唔止好波，而且人气高企，社交网Instagram「粉丝」数目近430万，红过唔少当打球星。

沙维西蒙斯12年前加入巴塞隆拿青年军，被睇好会成为下一位美斯，网上有大量佢嘅「球王片」，皇马、车路士等豪门曾试图签入呢位新星，结果3年前落入巴黎圣日耳门(PSG)之手。

呢位「辫子头」今年1月法足盃PSG对瓦纳，助攻基利安麦巴比入波，堪称两大天才世纪合作。不过，PSG始终太多球星，沙维西蒙斯上季仅上阵9次，佢今夏转投燕豪芬，踢荷甲超晒班，已经有8球进帐，射手榜上仅少过队友加普1球，尹戈尔都被打动，拣选从未为荷兰大国脚上阵嘅沙维西蒙斯参加世界盃。

虽然沙维西蒙斯已转投燕豪芬，但PSG仍然有回购权，将於2023年夏天生效，只要沙维西蒙斯继续有好表现，随时有望重返PSG，特别系经常传出基利安麦巴比想离开PSG，沙维西蒙斯将来或会成为麦巴比接班人。