C朗因为公开数臭曼联，面临被解约，亦遭到唔少球迷批评冇品，但仍然无损呢位37岁葡萄牙国脚嘅魅力，近日佢嘅社交网Instagram「粉丝」数目突破5亿大关，成为史上首位拥有5亿IG追随者嘅个人帐户。

C朗成为首位IG「5亿先生」，唔止证明佢人气高企，仍然大受球迷欢迎，而且背後亦蕴藏庞大经济利益。据悉C朗一个IG广告贴文收入高达230万美元，相信「粉丝」数目突破5亿之後，佢可以再加价。

除咗IG之外，C朗喺Twitter亦有1.05亿「粉丝」，Facebook上亦有1.54亿「粉丝」。

C朗好大机会明年1月转会市场重开之後离开曼联，虽然各主要大球会认为佢状态大不如前，无意签入佢，但如果考虑埋IG影响力，卖波衫等商业价值，相信仍然有唔少球会有兴趣邀请C朗加盟。