继宣布同C朗拿度提前解约後，英超劲旅曼联周三(23日)凌晨再有重大消息，球会发声明证实格拉沙家族正研究唔同经营方式，包括物色新投资者甚至将曼联出售。英国《每日邮报》指格拉沙家族叫价或高达90亿镑。

曼联联席主席阿夫拉姆格拉沙同祖尔格拉沙，喺声明中表示：「我哋正寻求延续曼联辉煌嘅历史，管理层同意研究唔同嘅经营策略，包括引入投资者、卖盘或其他交易方式，亦会评估球会各方面嘅潜力，包括球场等基础设施、扩充全球商业营运，目的系确保曼联男、女队嘅长期成功，令球迷、股东受惠。」曼联已经委托投资银行同顾问机构去进行今次计划。

据英国《每日邮报》报道，曼联目前市值约50亿镑，不过格拉沙家族嘅卖盘价可能高达90亿镑，作为曼联球迷嘅英国首富拉特克利夫，传闻会系潜在买家之一。

格拉沙家族喺2005年以7.9亿镑成功收购曼联，但佢哋将贷款转移到球会身上，令曼联负债累累，加上球队成绩下滑，17年来球迷不断发起「踢走格拉沙」嘅大小示威，早前C朗拿度接受皮尔斯摩根专访，亦有批评格拉沙家族嘅经营，如果今次卖盘成功，曼联球迷将系最大赢家。