世盃C组次名之争非常紧凑，墨西哥同波兰几乎要用「公平竞技积分」嚟定胜负，但最终沙特阿拉伯喺补时阶段入波，令墨西哥赢2比1都冇用，连续7届杀入世盃16强嘅走势断缆，领队马天奴赛後亦宣布离任。

C组次名斗得难分难解，当阿根廷2比0赢波兰完场後，墨西哥仲领先紧沙特阿拉伯2比0，当时两队系分数、得失球数字、对赛成绩完全一样，波兰会因为今届拎较少黄牌，靠「公平竞技积分」赢出，所以墨西哥喺最後几分钟全军进攻，力图争取出线嘅入球，点知最後反而被沙特阿拉伯偷袭得手。

墨西哥今场有高达26次攻门，其中有10次命中目标，可惜都系悲剧收场，自1978年後首次喺分组赛出局，而且喺1994年开始连续7届杀入16强，直到今届终於断缆。领队马天奴赛後表示：「我要为今日嘅结果负责，我同墨西哥足总嘅合约喺完场鸡响起後亦都完结。」