德国喺E组最後一轮4比2击败哥斯达黎加，但由於另一场西班牙意外输畀日本，仍然落得「赢波出局」嘅惨情结局。继4年前俄罗斯世界盃分组赛出局，德国再一次经历同样恶梦，领队费历克赛後话唔会怪责西班牙「帮唔到手」，并表明会考虑自己嘅去留，暗示可能辞职。

自1934年首次参加世盃拎季军後，德国除1950年被禁赛外，从未缺席任何一届赛事，到2014年第4度捧盃，都未试过喺首轮分组赛出局，结果2018年首尝苦味，今届更再一次重蹈覆辙。费历克赛後表示：「我唔会怪西班牙，出局系我哋嘅错，之前对日本同西班牙都有足够机会，但我哋把握唔到，所以好失望。」

德国上年欧国盃亦只系去到16强止步，决赛周後先到费历克上任，但随住今届世盃灾难结局，费历克嘅帅位亦受到质疑，佢回应话：「喺出局之後即刻答呢个问题(辞职)有啲难，我哋会尽快作出决定，大家唔使等好耐就会有答案。」