摩洛哥相隔36年再入世盃16强，车路士攻击手薛耶治有好大功劳，呢位29岁球星一直系争议人物，佢放弃荷兰选择摩洛哥，但又试过同领队不和而被除名，嚟到今届世盃修成正果，并将继续挑战国家队史上最佳成绩。

薛耶治系移民後代，佢喺荷兰出世，阿积士青训出身，踢过荷兰U20同U21梯队，到佢成年後选择代表荷兰定摩洛哥，结果佢拣咗摩洛哥，佢话：「选择国家队毋须思考，而系用个心，我喺荷兰出世，但我系摩洛哥人，我知道好多人都唔会明白呢种感受。」

薛耶治於2015年成为摩洛哥大国脚，出战2017年非国盃外围赛，但到决赛周决选时竟然落选，幸好一年後嘅2018年俄罗斯世盃顺利入选，但喺2021年佢被指态度问题，被时任领队夏利荷锡除名，无缘出战今年初非国盃。

薛耶治当时宣布退出国家队作回应，并拒绝出战世盃外余下赛事，几乎搞到收唔到科，最终夏利荷锡被炒鱿，薛耶治重返国家队，赶及出战今届世盃。摩洛哥世盃历史上最佳成绩，系1986年打入16强，今届摩洛哥已追平最佳纪录，如果击败西班牙入8强，将会开创历史。