瑞士翼锋梳顿沙基利虽然成就难与美斯、C朗相比，但佢喺上仗对塞尔维亚先开纪录，令佢连续3届世盃决赛周都有士哥，拍得住两大球王。

31岁嘅梳顿沙基利近年渐走下坡，现时只效力美职嘅芝加哥火焰，不过每逢为瑞士出战大赛特别醒神，今届世盃G组首轮对喀麦隆，佢妙传比列安保路攻入奠胜入波，日前喺G组尾轮生死战对塞尔维亚，呢位「瑞士美斯」更先拔头筹，成为最终赢3比2出线功臣之一。

查实「十字军」近27个国际大赛（世盃及欧国盃）入波，沙基利有份参与其中13球（入9球及4次助攻），单计世盃，沙基利於2014年对洪都拉斯连中三元，再喺2018年及今届两斗塞尔维亚各建一功，近3届都有士哥，只有美斯同C朗先做到，都咪话唔坚。

沙基利依家喺世盃累积5个入波，只差瑞士世盃士哥王晓治（Seppe Hügi）1粒，呢位已离世嘅瑞士名宿，在1954年世盃共入6球，意味住沙基利喺16强对葡萄牙只要有波入，便可追平队史纪录。