摩洛哥系今届世盃8强唯一唔系嚟自欧美嘅球队，不过呢支非洲雄师本身亦充满「欧洲味」，今届大军有14个球员并唔系摩洛哥出生，就连领队列格拉基都系法国出世。列格拉基表示起用「外援」做法曾经受到质疑，但杀入世盃8强後就令所有人收声。

摩洛哥26人大军当中，有14个并唔系摩洛哥出生，包括西班牙出世嘅阿舒拉夫、比利时出世嘅伊利亚斯查亚、法国出世嘅保法尔同队长路曼沙斯、以及荷兰出世嘅薛耶治、马沙拉奥同苏夫恩岩拉伯特等等，全部都系半个欧洲人，面对欧洲球队葡萄牙唔会陌生。

列格拉基赛前表示：「我好艰难咁争取起用呢班球员，呢个身份问题喺世盃前有好多麻烦，不断有记者会问『点解唔用番摩洛哥土生土长球员？』今日证明我哋全部都系摩洛哥人，入到国家队每人都愿意唔要命去战斗，我都喺法国出世，但冇人可以怀疑我嘅摩洛哥心。」