英联盃16强曼城以3比2击败利物浦，双方今夏新签2位射手交锋，艾宁夏兰特亦完胜达云纽尼斯，前者入靓波，後者浪费3次黄金机会，被网民嘲讽可以同阿根廷「败家仔」拿达路马天尼斯一较高下。

其实利物浦今仗有唔少攻势，达云纽尼斯就有4次射门，但都唔中目标，包括上半场41分钟，喺禁区右路射斜出界，其後传应罚球起脚，又系柱边出界。最离谱系下半场有1次单刀机会，结果又系射斜，否则利物浦应该唔会输。

达云纽尼斯今夏以1亿欧元转会费由宾菲加转投利物浦，早已被指系「水货」、「新卡路尔」，季初更曾领红牌被罚停赛，至今为红军上阵19场仅入9球，今场大战更加连番失机，同埋今届世界盃为乌拉圭出战3场分组赛都踢正选，但冇入波亦冇助攻，实在令人失望。

达云纽尼斯曾经被拎来同艾宁夏兰特比较，今仗再次证明两人并唔属於同一级数。