巴西喺卡塔尔世盃8强出局，成绩令球迷非常失望，领队迪迪喺被淘汰後已宣布辞职，不过呢位61岁教头返到巴西後竟成众矢之的，日前喺里约热内卢惨遇「报复式」打劫，有劫匪当街抢走佢身上财物後，仲「扭耳仔」批评佢教得差连累巴西失落世盃，非常侮辱。

巴西《环球体育》记者哥斯报道，已经离开巴西国家队嘅迪迪，日前清晨6点同老婆喺海滩散步，突然被一名劫匪袭击，抢走佢戴住嘅颈链之外，据报更出手「扭耳仔」羞辱迪迪，闹佢教波嘅方法、战术同排阵都唔掂，累到巴西未能第6度捧走世盃冠军。

据报迪迪喺今次劫案中未有受伤，呢位前巴西领队嘅发言人证实劫案确曾发生，但就否认曾经受到羞辱，表示当时曾经有热心途人帮手捉贼，但系未能成功，而迪迪同老婆之後亦可以自行离开。据巴西媒体《UOL》报道，迪迪仍然系巴西球坛抢手货，目前已有5间球会向佢开出聘约。