阿根廷喺卡塔尔勇夺世盃冠军，效力白礼顿嘅阿历斯麦亚里士打一炮而红，呢位世盃冠军主力据报获曼联、阿仙奴、车路士同祖云达斯斟介，不过最新消息指白礼顿并冇打算1月将佢卖走，将佢列为「非卖品」，阿历斯麦亚里士打更提早结束假期返英国备战，以表对白礼顿忠心。

英国《The Athletic》报道，阿历斯麦亚里士打同白礼顿合约到2025年先完结，而且仲有延长1年合约嘅条款，最重要系合约并有加设任何买断条款，所以白礼顿企硬嘅话，阿历斯麦亚里士打系唔可以转会，呢个亦系白礼顿喺1月嘅立场。

白礼顿原本畀阿历斯麦亚里士打放假到今个礼拜尾，不过呢位阿根廷中场周一(2日)提前归队，表明佢想为球会作战嘅决心，白礼顿周三(4日)凌晨作客爱华顿，如果领队迪萨比认为有需要，阿历斯麦亚里士打亦可以候命。