德甲劲旅多蒙特喺下半季冲刺前获天大喜讯，「抗癌斗士」施巴斯坦贺拿周三(11日)喺热身赛复出，去年夏天转会多蒙特後首度披甲上阵，呢位科特迪瓦前锋表明已经准备就绪，随时可以为多蒙特出战。

28岁嘅施巴斯坦贺拿今季前以3,100万欧元由阿积士加盟，原本被视为艾宁夏兰特接班人，点知佢连波都未踢，就被发现患上睾丸癌，过去半年经过4次化疗同2次手术後，周三热身赛对杜塞尔多夫终於复出，佢後备上阵获全场热烈掌声欢迎，多蒙特最终大胜5比1。

施巴斯坦贺拿赛後表示：「我收到好多讯息，我一直期待第1次为多蒙特上阵，等咗半年终於可以实现，我好挂住落场踢波嘅感觉。」多蒙特歇冬後首仗会系1月22号主场对奥格斯堡，施巴斯坦贺拿话唔会排除上阵，只会听从教练同医生嘅指示。