曼联近期重现霸气，令「曼市打吡」嘅大战味道更加浓厚，曼联领队坦哈格同哥迪奥拿曾经喺拜仁慕尼黑共事，曾被冠以「小哥帅」称号，查实坦哈格连造型都同哥迪奥拿有几分相似，除咗个光头之外，大家都锺意着樽领冷衫，今仗对战前就先上演潮人打吡！

据Paddy Power News报道，坦哈格同哥迪奥拿赛前就双方嘅衣着造型「驳火」，消息指荷兰籍教头坦哈格私下同人讲，哥迪奥拿着到似个「渔夫」；哥迪奥拿亦不甘示弱，反寸坦哈格衣着似「包装出错嘅香肠」，火药味十足。

对於今次造型风波，Paddy Power就搵嚟男士潮流杂志嘅主编品评，呢位专家表示：「自从般尼茅夫炒咗柏加之後，哥迪奥拿就成为英超领队潮流指标，佢都转过几次风格，最近嘅感觉的确好有航海味道，我幻想到佢喺一只加泰罗尼亚渔船上出海嘅画面，我想讲佢着冷衫绝对好过着嗰啲丑样嘅球会衞衣。」

至於坦哈格嘅造型，该潮流专家就表示：「我觉得话坦哈格系包装出错嘅香肠，真系有啲过火，坦哈格畀我嘅印象，似系嗰啲去试镜占士邦电影入面反派角色失败嘅人，希望呢个意见帮到你。」