冬季转会窗仲有两个几星期关闭，市场有大批今年夏天就会约满嘅球员，究竟佢哋会选择续约留队？等约满自由身走人？定系所属球会趁佢哋仲有叫座力，喺冬季转会窗卖走执番笔？呢班球员去向将成为市场焦点，唔知会唔会有死线惊天大交易出现呢？

心愿达成转会或为肥约

攞完世盃上咗神枱嘅美斯，呢两个礼拜嘅转会消息未停过，球王同PSG嘅两年合约，季尾就完结，主席艾卡里化当然好想佢续约，不过由於佢击败法国赢得世盃，加上基利安麦巴比因素，高调续约会有啲尴尬。巴塞主席拉波塔曾经提过要将美斯带番巴塞，但最大机会都系今季完结。沙特阿拉伯豪门希拉尔同样传出对美斯好有兴趣，更开出3.5亿美元年薪引诱佢加盟，仲唔介意佢依家即刻报到，嚟紧周四美斯会随PSG作客沙特斗利雅得明星队，除咗系同C朗交手之外，亦被指会同希拉尔代表会面，增添加盟嘅可能性。

美斯

位置：前锋 球队：巴黎圣日耳门 年龄：35岁

有兴趣球队：巴塞隆拿、希拉尔

留队机会：★★★

巴塞清冗员低价放人

巴塞隆拿上年夏天签入罗拔利云度夫斯基等多名进攻球员之後，已经打算放走迪比，呢位荷兰国脚亦难忍长居後备，渴望尽快离队，趁今个月转会市场重开走人嘅机会高唱入云。据悉巴塞隆拿仅要求400万欧元转会费，吸引到唔少球会，包括两支英超豪门车路士同纽卡素，但随住车仔签入祖奥菲历斯之後，佢上「车」机会大减，令纽卡素有机可乘。不过，迪比倾向重返曼联，跟荷兰同胞坦哈格搵食。另外，马德里体育会亦积极斟酌迪比。

迪比

位置：前锋 球队：巴塞隆拿 年龄：28岁

有兴趣球队：车路士、纽卡素、加拉塔沙雷

留队机会：★

唔妥主帅冇得留低

李安特杜沙特喺世盃前曾拒绝白礼顿嘅新约，复赛後喺英超对阿仙奴表现曳爆被换出，自此被打入冷宫。近日佢经理人仲发文，怒斥白礼顿对杜沙特唔公平，因为佢喺训练时同另一球员发生争执，主帅迪萨比便整整4周冇同杜沙特沟通，上场对利物浦更冇入比赛名单，而迪萨比反驳呢位比利时国脚态度有问题，对於唔系付出100%投入嘅球员，宁愿唔用，睇嚟大家已经反晒面，冇得留低。据报皇马同热刺都对杜沙特有兴趣，尤其系热刺主帅干地希望加强边路侧击，随时冬窗出手抢人。

李安度杜沙特

位置：中场 球队：白礼顿 年龄：28岁

有兴趣球队：热刺、皇家马德里

留队机会：★

狐狸低迷另谋发展

比利时世盃中场泰利文斯喺李斯特城效力刚满5年，共为狐狸上阵超过181场，攻入28球，赢过英足盃及社区盾，由小将成长为一位独当一面嘅攻击手，虽然球队受到成绩下滑、财政不稳等因素影响，泰利文斯仍能保持高水准演出，多次拯救球队，但佢嘅合约即将到期，他亦无意与会方续约，势必另谋发展。今夏回复自由身嘅佢，获得纽卡素及阿仙奴两支更有竞争力嘅球队垂青，无论佢最终选择咩，佢未来都会更光明。

泰利文斯

位置：中场 球队：李斯特城 年龄：25岁

有兴趣球队：车路士、纽卡素、阿仙奴

留队机会：★

出手太低多蒙特难留人

尤素法莫高高上年以18岁零3日之龄喺世盃披甲，创下德国最年轻世盃上阵纪录，不过佢对续约多蒙特一事采取拖字诀。因为莫高高正受到巴塞同纽卡素等球队垂青，佢趁机狮子开大口要求800万欧元年薪，比多蒙特最初提出嘅400万欧元年薪多出一倍，「蜜蜂兵团」亦决定加码，开出一份为期5+1年、年薪达600万欧元嘅新约，只要莫高高扑槌，仲会获得1000万欧元签字费，不过比起纽卡素开出嘅800万欧元年薪仍低，多蒙特似乎好难留得住呢位德国足球新希望。

尤素法莫高高

位置：前锋 球队：多蒙特 年龄：18岁

有兴趣球队：巴塞隆拿、纽卡素

留队机会：★★

伤多过踢难求长约

车路士今季战绩欠佳，同尼高路简迪因伤缺阵有莫大关系，重要性不言而喻。不过监於简迪近年不时受伤，单系今季英超只系出得两场，甚至缺席上年年尾嘅世盃，加上简迪都年逾30，有指车仔班主保利开出为期两年、另加一年优先续约嘅新合约，但已被简迪拒绝，因为呢位法国国脚想获一份年期更长嘅合约，希望喺车仔踢到收山，之後车仔再提供一份到2026年嘅新约，但冇加人工，而有C朗坐镇嘅艾纳斯立即出手招揽，呢支沙特球队出手阔绰，简迪去中东搵食唔奇。

尼高路简迪

位置：中场 球队：车路士 年龄：31岁

有兴趣球队：艾纳斯

留队机会：★★

忠心耿耿获沙维挽留

布斯基斯系西班牙及巴塞隆拿盛世硕果仅存嘅成员，未满26岁已经赢尽欧联、欧国盃及世盃各大奖项，虽然身边嘅沙维、恩尼斯达、美斯、韦拿都已经挂靴或离队，而碧基亦都喺去年11月宣布挂靴，布斯基斯仍然屹立不倒，尽管今夏将与巴塞约满，呢位老黄忠仍然被视为球队重臣。喺卡塔尔世盃後，布斯基斯宣布退出国家队，他曾讲过转战美职国际迈亚密，不过喺多年战友兼主帅沙维极力挽留之下，好大机会留喺巴塞踢多一年。

布斯基斯

位置：中场 球队：巴塞隆拿 年龄：34岁

有兴趣球队：国际迈亚密

留队机会：★★★★★

沙利遗臣等被清洗

佐真奴系车路士沙利年代遗臣，当年沙利带同佢从拿玻里过档车路士，结果沙利早已离队，佐真奴却踢到今时今日，上阵200多场入29球，为车路士赢过欧联、欧霸、世冠盃、欧超盃等奖项，前年更协助意大利夺得欧国盃冠军，系国家队及球会嘅中场大脑及12码刽子手。近年佐真奴事业运急跌，他喺世盃外对瑞士射失12码，令意大利出局而大受打击，车路士亦经历班主更迭及换帅，尚余半年合约嘅佢因为球队重组势必被清洗，传闻巴塞隆拿有意今夏免费签佢，来季好大机会转战西甲。

佐真奴

位置：中场 球队：车路士 年龄：31岁

有兴趣球队：巴塞隆拿

留队机会：★

哥帅器重留队机会大

德国中场根度简效力曼城第7季，一直系「蓝月亮」嘅中流砥柱，虽然名气唔似阿古路、奇云迪布尼、艾宁夏兰特等球星响亮，但4次英超冠军佢都有唔少功劳。根度简近两季一直有离队传闻，但仍然留队兼获领队哥迪奥拿信任，不过佢同曼城嘅合约到季尾就完结，告别曼城嘅日子似乎愈嚟愈近。曼城迟迟未同根度简开出新约，换血用意相当明显。传闻佢获拜仁慕尼黑等德甲劲旅垂青，不过曼城依家仲要争欧联同英超，喺加云菲腊斯仍未成气候之下，根度简下半季仍会担当重要角色。

根度简

位置：中场 球队：曼城 年龄：32岁

有兴趣球队：拜仁慕尼黑、巴塞隆拿、祖云达斯

留队机会：★★★★

锋线爆人位置受影响

利物浦着名嘅「埃及文明」锋线，近两季火速换班，沙迪奥文尼已转投拜仁慕尼黑，31岁巴西前锋罗拔图法明奴今夏约满後，亦好大机会结束8年「红军」生涯。领队高普近两季签入大量攻击球员，迪亚高祖达、路尔斯戴亚斯、达云纽尼斯同加普都以高价加盟，令罗拔图法明奴嘅位置大受影响，上季只有10场英超正选上阵。罗拔图法明奴自知喺球队冇未来，续约一事并唔观，传闻巴塞隆拿、马德里体育会、韦斯咸甚至沙特阿拉伯球队艾纳斯都对佢有兴趣。

罗拔图法明奴

位置：前锋 球队：利物浦 年龄：31岁

有兴趣球队：巴塞隆拿、马德里体育会、韦斯咸、艾纳斯

留队机会：★★

蜜蜂玩青春续约渺茫

身为多蒙特队长嘅马高列奥斯由2012年开始效力「蜜锋兵团」至今，近11年先後睇住罗拔利云度夫斯基、马里奥葛斯、奥士文尼迪比利、艾宁夏兰特等好拍档离队，寻找更好发展，佢都不为所动，希望效力多蒙特至挂靴。不过会方并唔系咁谂，球会重用年轻球员，加上佢经常受伤，所以迟迟未开出新约。据悉，佢须减薪先可续约留队，料双方将喺赛季结束再倾续约，所以佢1月离队机会唔大。马高列奥斯年纪唔细，若未能续约，好大机会离开欧洲球坛，沙特阿拉伯豪门艾纳斯有意签入佢，同C朗组成锋线。

马高列奥斯

位置：前锋 球队：多蒙特 年龄：33岁

有兴趣球队：艾纳斯

留队机会：★★★

经常扭计祖记求抛售

拉比奥特上年夏天几乎转投曼联，但因为佢嘅妈妈兼经理人Veronique狮子开大口，要求超过20万镑周薪，因而未能成事。呢位法国国脚今季表现出色，并协助法国打入世盃决赛，祖云达斯原本计划同拉比奥特续约，但佢要求1,000万欧元年薪，先至肯续约，会方认为数额太高，唔可以接受，预料双方将无法达成协议。祖云达斯打算今个月出售拉比奥特，只要求1,500万欧元转会费，近期传出阿仙奴有意接货，藉此提升实力争夺英超冠军。

拉比奥特

位置：中场 球队：祖云达斯 年龄：27岁

有兴趣球队：阿仙奴

留队机会：★★