希拉尔喺世冠盃4强以3比2击败法林明高，除咗艾达沙尼之外，另一位前锋韦图亦功不可没，呢位29岁阿根廷球员今仗博到2球12码，造就艾达沙尼射入梅开二度，其後自己亦有1球进帐，一人创造3入球。

韦图曾经效力西甲球队维拉利尔及马体会，并於2015年10月马德里打吡入波，协助马体会打和当时有C朗助阵嘅皇马1比1，估唔到两位昔日对手，依家喺沙特重遇。

韦图2014年由竞赛会加盟维拉利尔，1年後转投马体会，但大部份时间被外借，包括去过西维尔、华伦西亚、富咸，2019年加盟C朗母会士砵亭，两年前以700万欧元转会费加盟希拉尔。

可以胜任翼锋及前锋嘅韦图虽然入波数字唔高，但胜在突破能力强，今仗导致法林明高球员2次喺禁区内侵犯佢，就系最佳例子。

韦图过去足球事业麻麻，估唔到去亚洲搵食，反而有机会踢世冠盃决赛，可以话系吐气扬眉。

值得一提，今仗入2球12码及1次助攻嘅艾达沙尼都曾经短暂效力维拉利尔，「黄色潜艇」成为希拉尔背後推动力。