李斯特城上仗英超以4比1大胜热刺，占士麦迪臣入1球及1次助攻，今季联赛上阵16场已有9球进帐及5次助攻，成为今季欧洲5大联赛最多入波嘅中场球员，唔少球迷认为英格兰主帅修夫基应该重用占士麦迪臣，出战3月两场欧国盃外围赛对意大利及乌克兰。

26岁嘅占士麦迪臣近年一直有好表现，上季英超上阵35场入12球，以佢今季入球率，应该可以再创个人单季入波新高。事实上，以往不时传出曼联及曼城等大球会有意签入占士麦迪臣，曼城上月提出以5,500万镑收购佢，但被李斯特城拒绝。

虽然占士麦迪臣喺球会表现光芒四射，但一直未获英格兰主帅修夫基重用，自2019年首次为英军上阵後，再未有披甲，即使有份入选今届世界盃大军名单，但并冇上阵机会。

英格兰球迷近期为占士麦迪臣抱不平，认为佢唔止值得入选，更加有能力担任「三狮兵团」正选，呼吁修夫基重用麦迪臣，提升英格兰攻力。