国际米兰寻晚意甲0比0闷和森多利亚，正选上阵嘅卢卡古大发脾气，比赛期间同队友爆发口角，传媒搵读唇专家分析，指出佢当时不满队友摊手埋怨，感到自己受侮辱，令到玻璃心受伤害而发怒。

卢卡古今仗正选披甲，初时表现尚可，取得射门机会但唔中目标，不过之後踢到无影无踪，教练施蒙尼恩沙基喺66分钟换走佢。

渣古错失机会好闲，队友摊手亦系正常反应，但今次卢卡古就发脾四，突然指住队友尼高路巴列拿，目露凶光破口大骂，虽然现场收唔到音，唔知佢讲乜，但有读唇专家帮手解读。

卢卡古当时话：「你唔好得寸进尺，呢啲动作已经够喇，唔好再摊手，咁样好侮辱人，唔好再埋怨队友，同我停手！」当时尼高路巴列拿反驳咗一句，卢卡古更加嬲，破口大骂：「收声，你老X！」

由於卢卡古表现持续低迷，有报道指国米打算今夏向车路士压价，仅以半价续借，至於车路士打算止蚀，计划以低价抛售，总之渣古再唔改善表现，肯定冇运行。