车路士新班主保利上场後，2个转会窗狂烧逾6亿镑买人，但系当中唔少收购都受到质疑，甚至被网民称为「水鱼」。不过车路士渔翁撒网式嘅买人，亦有「执到宝」嘅例子，1月以1,100万镑加盟嘅巴西新星安迪利山度士，周二(14日)抵伦敦正式报到，佢就被视为保利嘅最佳收购。

18岁嘅安迪利山度士由华斯高加盟後，未有即刻去车仔报到，而系飞哥伦比亚为巴西出战U20南美国家盃，呢位中场周日(12日)成功带领巴西夺冠，佢亦以6个入球并列赛事金靴奖，表现光芒四射，1,100万镑转会费签入巴西明日之星，绝对系非常划算嘅投资。

安迪利山度士带住冠军同金靴之名飞伦敦报到，不过仍要申请工作证，未知几时先可以正式上阵，早前有传车路士打算将佢外借返巴甲磨练，但随住佢喺U20南美国家盃嘅成熟演出，安迪利山度士团队决心即刻展开车路士生涯，有信心佢可以尽快喺英超上位。