现年27岁嘅捷克国脚积及赞图，周一(13日)喺个人社交网拍片公开出柜，成为西甲首个出柜嘅职业男子球员，英超、西甲赛会都公开支持积及赞图，连巴西国脚尼马亦作出声援。

积及赞图系基达菲球员，依家被借外返捷克布拉格斯巴达，佢喺影片中表示：「大家好，我系积及赞图。同所有人一样，我有自己强项同弱点，我有家庭、朋友，我有工作，而且多年来一直用认真、专业、热情去做到最好。同所有人一样，我都希望喺冇恐惧、冇歧视、冇暴力，只有爱嘅环境下自由生活，我系一个同性恋者，亦唔打算再隐藏自己。」

积及赞图出柜获各方支持，基达菲声明指：「非常敬佩同无条件支持我哋嘅球员积及赞图。」英超赛会亦留言：「我哋同积及赞图同在，足球系畀所有人参与。」就连巴西球星尼马喺欧联赛前记招亦表示：「今日系重要日子，所有人都应该得到自由，所有形式嘅歧视都唔应该出现，我冇睇过积及赞图段影片，但所有人都应该自由做自己锺意嘅事。」