英超争冠形势大逆转！周四(16日)凌晨英超榜首大战，曼城作客3比1技术性击倒阿仙奴，追到同分情况下凭较佳得失球登上榜首位置。今次系英超历史上，第3次喺下半季出现第2名赢第1名後抢走「1哥」情况，之前2次後上嗰队都顺利逆转封王，成为曼城夺冠吉兆！

近况下滑嘅阿仙奴今场赛前收到坏消息，中场核心汤马士柏迪肌肉受伤缺阵，上半场两队势均力敌，24分钟阿仙奴右闸富安健洋「自杀式」回传，奇云迪布尼截到乖巧笠入。阿仙奴之後加强攻势，42分钟尼基迪亚博到12码，布卡约沙卡操刀追成1比1平手。

阿仙奴下半场控球较多，但後场多次错误就铸成大错，72分钟加比尔马加希斯传球失误，曼城把握反击机会由基亚利殊射入2比1，再次落後嘅阿仙奴空群出击力图反扑，10分钟後再被艾宁夏兰特禁区内轰入，最终以1比3落败兼断送榜首位置。

曼城赢波後同踢少场嘅阿仙奴一样有51分，但得失球有10球优势登上榜首。Opta数据显示，曼城系英超史上第3队喺下半季嘅榜首大战，以「阿2」身份赢波後上榜首球队，2010年4月车路士赢曼联、2012年4月曼城赢曼联，两队都喺榜首大战逆转後最终拎到冠军。

曼城领队哥迪奥拿赛後表示：「阿仙奴踢少1场，所以我仍然当佢哋系榜首。几个星期前我哋仲落後8、9分，如果作客输埋就正式玩完，不过阿仙奴最近失分，我哋今场赢波就仲有得斗。」阿仙奴主帅阿迪达就不满球队表现：「对住曼城容错率近乎系零，但我哋就送咗几次机会畀对手，系唔会有机会赢波。」