英超包尾嘅修咸顿日前将领队尼敦锺斯炒鱿，据英国传媒报道，「圣人」预计好快就会有新帅上场，消息指早尼敦锺斯几日「落镬」嘅马殊，已经同修咸顿进行接洽，好大机会达成协议，马殊有望闪电喺英超再次落班。

英国《太阳报》报道，被列斯联炒鱿嘅马殊，早喺德甲年代已经系修咸顿观察对象，佢同修咸顿前领队夏辛侯特都属於「红牛系」教练，战术风格亦接近，据报马殊喺周一(13日)已同修咸顿高层交涉，顺利嘅话甚至有机会喺周六(18日)对车路士前落实。

至於同样物色新帅嘅列斯联，周三(15日)宣布看守领队施古巴拉会喺「未来几场」比赛继续领军，令球队有更多时间拣选合适嘅新帅人选。据报列斯联近日曾邀请华历简奴嘅伊拉奥拿同飞燕诺教练施洛，但都系「食柠檬」收场。