周四(16日)凌晨西甲赛事，新鲜出炉世界冠军皇家马德里尽显霸气，主场4比0大炒艾尔切，依家落後榜首巴塞隆拿8分排第2位。法国前锋宾施马今场梅开二度，令佢超越传奇鲁尔嘅入球纪录，成为皇马史上入波第2多球员。

皇马今场踢得轻松，马高阿辛斯奥开波8分钟个人表演式入波，宾施马之後更2度主射12码建功，皇马半场已遥遥领先3比0，收够筹嘅皇马下半场放软手脚，莫迪历喺80分钟锦上添花，协助皇马大胜4比0完场。

宾施马今场入2球後，历来累积230个西甲入球，超越鲁尔228球纪录排皇马史上第2位，仅次於C朗拿度嘅311球，喺西甲史上亦排第5位，距离第4位嘅山齐士(234球)只差4球，甚至有力挑战第3位嘅萨拉(252球)。

皇马教练安察洛堤赛後表示：「宾施马唔单止系前锋，佢系全能球员，同队友合作得好好，佢拥有神奇嘅足球生涯，希望佢可以继续保持呢种表现，皇马需要呢个水平嘅宾施马。」