周日(19日)凌晨西甲赛事，皇家马德里赢完世冠盃後勇态持续，作客以2比0轻取奥沙辛拿，乌拉圭中场费达历高华维迪入球大爆发，今场攻入近4场第4个入球，佢赛後表示今季目标已由10球提升至20球。

皇马今场控制战局，但系迟迟都入唔到波，直到78分钟云尼斯奥斯祖利亚左路传中，费达历高华维迪後上射入；补时阶段皇马前场反抢成功，马高阿辛斯奥禁区内射成2比0完场。皇马赢波後各项赛事4连胜，为周中欧联利物浦打下强心针。

皇马教练安察洛堤季初为费达历高华维迪定下今季入10球目标，否则佢会撕烂自己张教练证书，费达历高华维迪今场已入到12球，佢赛後表示：「佢哋(队友)依家同我讲话要入20球，我觉得有啲过份罗，不过我会尽自己所能，以前我会拣传波多过射波，因为信心唔够，但依家我会先考虑入波机会。」