所有颁奖礼都离唔开是是非非，今届FIFA颁奖礼亦有唔少勾心斗角嘅好戏，据报皇家马德里因为不满「食白果」，选择杯葛今次颁奖礼，所有球员、教练都冇出席；至於最佳球员排第2嘅基利安麦巴比，喺「仇人」达米安马天尼斯领取最佳门将奖嗰阵，亦被影到喺台下面嬲爆爆，花生味十足。

阿根廷门将达米安马天尼斯喺世盃决赛後，多次公开嘲讽麦巴比，包括话要为麦巴比「默哀」，以及喺胜利巡游拎「麦巴比喊包」公仔奚落。当达米安马天尼斯领取最佳门将奖上台致辞，镜头突然影住台下嘅麦巴比，见到呢位法国前锋面如死灰咁「睥」住台上，大批网民都话佢完全唔打算隐藏内心不满之情。

喺阿根廷赢世盃冠军下，拎欧联同西甲冠军嘅皇家马德里沦为大配角，宾施马、安察洛堤、泰拔高图尔斯等候选人全部落空，《马卡报》指皇马决定杯葛颁奖礼，最终亦真系冇派人出席，就连入选最佳11人嘅莫迪历都冇现身。