阿根廷上年底勇夺世界盃冠军，实现「球王」美斯毕生心愿，据报美斯为答谢一班队友嘅付出，豪掟17.5万镑订制35部24K黄金iPhone，送畀阿根廷一班职球员，认真豪气！

美斯委托手机设计公司iDesign Gold一齐设计呢款特别版iPhone，iDesign Gold行政总裁李昂斯表示：「美斯喺世盃决赛之後就搵我哋，佢想送礼物畀所有职球员去庆祝呢个特别时刻，但又唔想送手表咁普通，我就提议送黄金iPhone，上面再特别印上球员名同号码，美斯听到就好锺意呢个计划。」

根据iDesign Gold曝光嘅图片，每部黄金iPhone中间都有阿根廷标志，并刻上「世界冠军2022」字样，而每部手机都有各自球员名同号码，成为世上独一无二嘅手机。